هي الفلوس بعزقة ؟!
ــــــــــــــــــــــــــــــــــــــــــــــــــــــــــــــــــــــــ
عقلي طار منى .. أتجننت
اشتريت كاميرا
وعلى سطح الدار
طلعت
ما نفعت
ركبت المدنة
عالية.. عالية
هب ، وصورت
والصورة :
اللي راكع واللي ساجد
واللي لسه موطى
ح يتوضا
واللي ع الطبلية بـ يرفعوه
ح يشنقوه
وقطر مليان ركاب
وحماره وطيارة
وبقرتين وجاموسة
وعروسة قاعدة في الكوشة جنب عريسها
وواحدة بـ تولد
واللي غرقان في دمه
ع الطريق
م حد لمه
وركن في السما مزروع حمام
وكام وردة وكام فله
متنطورين
والجزار في ايده سكينة ، وابنه ساطور
وسيّيط
بـ يضرب بالموال
اللي اطّوح واللي ممدد
واللي طالة من شرفتها
نازله زراغيد
وعيل يا عيني صغير شايل شنطة
فيها هم الدنيا
م تقولش مهندس
باين عليه دكتور
وواحد رافع جزمته
وامه قاعد
بـ تخبي راسها منه
وناس عامله لمه
وواحد فى أيده رغيف
وواحدة معاها قرطاس طعمية
فجل وجرجير وطبق فيه فول
ومعزة وخروف
وناس بـ تعزى ومقرء
ونعش ماشى
باين عليه فقير مسكين
واللي قاعد فارش بـ يبيع دره مشوي
وكشك بتاع كشري
وفى القهوة تليفزيون
جايب صورة واحدة ملص
وواحد شايلينه عايزين يهبدوه
واللي زفوه
على كرسي العرش حطوه
ناس شيك
قدامها عدادات وشاشات
وصاروخ وقمر صناعي
ومترو وترمواى
ونهر فيه مية
حواليه خضرة
وشجرة
ووزة وبطة في البركة عايمين
وصبية شايله لوح عجين
ودبابات ومدرعات
وناس في الشوارع
ميتين مرميين
وبنات في كوم زبالة
عريانين
وولاد يا عيني غلابة . تعبانين
وواحد باين عليه ضرير
ماسك فى ايده كتاب ، واخوه جنب منه
في حجره قلم وكراسة
وحكم بـ يصفر وجمهور
ماتش كورة ، ومدرج مليان مشجعين
وناس ساكتين
م تقولش نايمين
عربية اسعاف
يظهر انها ماشيه بـ تزمر أنين
وصندوق احمر ، ويفط مكتوبة
وناس ماشيين
وعلى حرف الغيط
فلاح ساند ضهره
جنبه شجرة طالع منها فروع وورق اخضر
وقلة ، وحمار مربوط وجموستين
ووتد مدقوق
نجار ومنشار وشاكوش
ومصنع داير
ودورية ، وعمال داخلين
وقهوة كمان ، أي والنبي قهوة
وفيها ناس
رجل على رجل . مدخنين
وجامع . اللهم صلى على النبي
كبير . كنيسة ودير
يا خبر !! يادى السوخة !!
خمارة!؟
كاس وسيجارة
وواحد بـيرقص مع واحدة
يا عينى عليه. مسطول
وعصفورة على شواشى شجرة
بتبنى لفرخها عشه
وأسد ونمر ، وتلات زرافات
وشجر يامه
وعيل بـيجرى ع الرصيف ورا أبوه
ومحل جزم عارض شنط
وحرامي ناس بـتجرى وراه
باين كده عايزين يمسكوه
ومدرس راسه من شباك الفصل باينه
وروس تلاميذ
يمكن تكون جامعة ؟!!
يمكن . وواجهة مستشفى
هايلة
واقف عليها بواب
ونازل م العربية دكتور
وظابط راكب حصان
وخمس عساكر ماشيين
وإشارة مرور
وواحدة ماسكة فرخه لـ جوزها يدبحها
وحتة باينة من جبل يظهر عليه عالي
واقف من سنين
وواحد بـ يرقدوه. أكيد ح يجلدوه
عشان ماسكينه جامد
وبـ يضربوه
وباب سجن بضلفتين
وبنت حلوة
يا هووه
شوف
على النعمة لسه طالعه م الكوافير
شوف كده !! بص كويس
اهو ده الكوافير
باين منه حتة
( والصورة كبيرة ومليانة . ح أقول لك إيه واللا إيه !!؟
خد أنت شوفها واتفرج عليها، وبعد م تخلّص. قطعها..)
ورجعت للكاميرا . ارميها !!؟
وحياة حبيبي النبي لـ مكسرها، وتوبة
عمري وفى حياتي
ما اشتريها
هي الفلوس بعزقة واللا يعنى أنا لاقيها
تعليقات
إرسال تعليق