ابن الناس الطيبين
ـــــــــــــــــــــــــــــــــــ
فلاح بسيط . عادى
سارح الغيط
راكب حماره .. عارفه الطريق
صارر غداه جنب منه في منديل
ع الغبيط فاس ومنجل وقلة فخار
لابس جلابية قطن
وكلبوش صوف على راسه
وفى رجله بلغة . منعاصة طين
مشيت وراه
وصل
نزل
ربط الحماره في جزع صفصافة
وأرضه ناحية الترعة قيراطين
والمصرف ع اليمين
بص
مشى
يتمخطر ويتمايل
عزق له عزقتين
رجع
وفى أيده حاجة خضره
في المصرف رماها
قعد
وقعدت أنا معاه
أتفضل
وشربنا كوبايتين
ولعت أنا سيجارة
وهو من الجوزة
سحب له نفسين
قال لي :
تعرف الجلابية دى . من قطن غيطي
غزلها الغزالين
والكلبوش من صوف غنمي
عملوه الصّوافين
والبلغة جلد طبيعي
من جاموسة بعتها
دبغ جلدها الدباغين
وقمح دارى كان سنابل
غلة القيراطين
وأم العيال جماعتي
ربت لنا الفرختين
ندبح وناكل ونتعشى
وفى الصبح الفطار فطير للعيلن
وفى العشا جبنه ولبن
نحمد ربنا . نبات متعشيين
قلت له : وأولادك ؟؟
قال :
محمود الله يحرسه في مصر دكتور
فاتح عيادة أبهة من سنين
وأخته سعاد مدرسة
م هي تبقى مرات الشيخ يس
وفتحي عامل في دمنهور
يشغل لوحده مصنعين
وخيرت سافر
قال يجيب له قرشين
الحمد لله .. خير وبركة
كلهم كويسين
قلت له :
يا عيني .. قاعد لوحدك !؟
قال :
وأم العيال والأهل والأحباب والقرايب
والجيران . يا سلام ع الونس والمحبة
ناس بصحيح طيبين
تعليقات
إرسال تعليق