صورة فى زمن ..
  ـــــــــــــــــــــــــــ

عريس قاعد جنب عروسته


فى الكوشة


رجل على رجل . م حد قده


بـ يبتسم بطرف شفايفه


هيصة وزيطة . زراغيد بـ تّدوى


بنات . نسوان . انوار حمرا وصفرا وخضرا ولبنى


شبان بـ تطبل ، وتصقف . بـ تغنى


وعالمة عمالة بـ ترقص


اردافها بتنهز بسرعة 1000 مرة/دقيقة


شوبش يا حبايب . زنوبة


وبنت بـ فيونكات . فستانها احمر


كوبايتين شربات بلون الفستان


للعروسة ، وللعريس يشرب


هيصة عيال . صبيان . رجال . شبان ، وكمان بنات. نسوان


مزيكة وطبل ورقص ، وشوبش يا حبايب . زنوبة


ومعازيم هايصة وزايطة ، وانوار . الفرح طلّع من قلب الضلمة نهار


فساتين اشكال والوان


روايح وعطور ، وبخور ، وهيلة وهليلة ، وصلى ع النبى . صاالى


صلى صلى . صالى . ع النابى . صالى


هوسة ودوشة وزفة وفرحة ، وهيييييصة ، وكانت ليلة لـ صورة


فى برواز ..