حوادث سيارات
ــــــــــــــــــــــــــــــ
توقف فجأة .. لعل شيئا ما اعترض طريقه . طوبة . حذاء معروض في فترينة . بنت حلوة واقفة في محل ملابس داخلية . إعلان عن نوع دواء جديد لحالته . حصوة رمل دخلت فجأة في عينه أو بعوضة . فكرة عارضة لمعت بذهنه .. لم يتنبه إلى السيارة التي مرقت من أمامه مسرعة . كادت أن تدهسه . . بائع العرقسوس يدق بسنجه : " اشرب . حلو ولذيذ . العرقسوس . اشرب .. " .. مالت على حذائها . خلعته . طوحت به في الهواء . صرخت : " والله يا ابن السافلة . لو م احترمت نفسك . لـ مرقعة صداغك بالجزمة دى . أمشى ساكت أحسن لك .. " . طأطأ رأسه . قال بأدب : " خلاص . خلاص . ح أمشى . بلاش فضايح . إحنا في الشارع .. " .. " اللمون . بنزهير يا لمون . مخلل .. يا اللي تعصفر .." .. توقفت السيارة الأجرة . نزلت . فتح الباب جهة اليسار . نزل هو الآخر . دخلا العمارة . تحركت السيارة . اختفت . . وقف . تسمر في مكانه . تتابعت صرخاته : " عايز كراتيه يا ماما . يا بنت الكلب يا صايعة.." لطمته على خده . كانت اللطمة قوية . صرخ صرخة مدوية . اشترت له كيس كراتيه .. " لو سألتك . قولي لها : مراته . خطيبته . شغالة عنده . غسالة . سكرتيرة . ممرضة جايه ادّى له الحقنة . أوعى تقولي لها إننا حرامية . فاهمة !! " .. " ايوه يا حبيبي . أنا واقفة في الشارع قدام البيت بالظبط . لا . مش عارفه . يعنى هو ده البيت فعلا ؟ نزلت!؟ مش عارف !؟ مش عارف إذا كانت مراتك نزلت واللا لا !؟ أنت أهبل !!؟ " . أغلقت المحمول . دسته في حقيبتها . اختفت . . البالونات بكميات كبيرة تطير في الهواء . مربوطة بالخيط . العصا الطويلة في حضنه وقبضته ، وذراعه المضمومة إلى صدره . يزمر .. " هات بلونه يا عم .. " .. عاد بائع العرقسوس . " فعلا . العملية كانت صعبة . الحمد لله . نجحت .. هو دا الوقت في غرفة الإنعاش .. " .. أغلق عم حسن محله ، انصرف يصلى العصر . اتكعبل في عود قصب . وقع في الشارع . سب له بالدين .. قالت لها : " عدّى يا ولية فلوسك تانى . أنا مش حرامية .. " .. قالت لها :" إحنا نروحوا القسم أحسن .. " .. خرج المصلون من المسجد .. " . عم حسن فتح الدكان .. " من فضلك . هات كباية عصير .. " .. قال له : " تصدق بالله . علم النجوم ده كله هجس في هجس . نصب ودجل ، وضحك على الدقون .. " قال له : " هات كفك .. " . راح ينظر في كفه بتأمل ، ثم رفع إليه وجهه .. قال له : " انت ح تتجوز واحدة اسمها نادية . ح تاخد علاوة تشجيعية . ح تسرق عشر تلاف جنيه . ح تدخل السجن ست شهور . مراتك ح تجيب ولد ح تسميه مصطفى . أخرتك ح تكون على ايديه . ح تموت يوم سبت . بين العصر والمغرب . الجنازة ح تكون كبيرة . مراتك ح تتجوز واحد اسمه على . ح يطلقها بعد أسبوع . ح تحبل منه . ح تجيب بنت اسمها جنات . على ح ياكل حقها . ح تشتكيه في المحكمة .. مرت سيارة . دهسته .. قالت له : "الستاير دى غالية .." قال لها : " هات اللي قلت لك عليه ، وخديها .. " أخذت الستاير ومشت .. " منك لله . ح تروحي من ربنا فين ؟! الله يدوخك زى م انت م دوخانى .. " بصت له . بصقت في وجهه ، سحبته من ذراعه .. " الله يخيبك راجل . آه . لو م كنت بـ احبك واموت فيك . تعال . تعال ادّيك حاجة حلوة . م انا عارفه . انت بـ تموت فيها .. " .. المغرب أذن .. الصلاة انفضت .. قال لها : " انا واقف من ساعة العصر . افتكرت انك موتى . كنت ح امشى .." قالت له : مش قلت لك تعال . تعال ادّيك حاجة حلوة .. "
تعليقات
إرسال تعليق