الصبي والطائرة
ـــــــــــــــــــــــــــــــ
هناك . بعيدا جدا . جدا .. ثلاث كلمات .. تشبه الطائرة الورقية . الصبى على الارض ممسك بطرف الخيط ، وهى ، الطائرة ، تحلق فى السماء . تبحث عن مكان لها وسط النجوم عندما ينزل الليل على الارض . الطائرة تعكس أشعة الشمس ، او تداعبها بتلك البقعة الصغيرة التى رسمتها على الارض ، فى شكل سداسى منتظم يترجرج كلما داعبها الهواء ، هواء ما بعد العصر ، الطائرة المحلقة فى السماء ، الصبى ينظر اليها بعينى المراقب او القائد الحريص على ارواح الركاب .. هناك . " آه . لو اركبك . نفسى اجيب واحدة . اجيب نجمة كبيرة . اعملها فى الدار نجفة . اعلقها فى السقف ، وافرج الناس عليها .. البنت سلوى بنت المجنونة . تقعد طول النهار والليل تتفرج عليها .. ح افضل اطول فى الخيط لحد م اوصّلها للسما .. " الطائرة تصعد . تصعد ، وكلما صعدت صغر حجمها .. صغرت . صغرت .. لم يعد يراها .. " تاهت . لا . هى اكيد لسه بـ تدور .. هات لى نجمة يا طيارة .. " ليل . نهار . زمن ، الصبى قاعد على حرف الجرن مستنى . يقعد شوية ويقف شوية .. الطائرة . الليل . النجوم .. " يا ترى انت فين يا طيارة ؟؟ " حد ابن ستين كلب سرقها ؟! لا . مش معقول . الطائرة فى السما .. آه . هى دى الطيارة . اللى بـ تلمع هناك ومنورة . ." نور . ظلام . ايام .. الطيارة بصت له . عرفها . ضحك وابتسم .. حط الخيط على ودنه . يسمعها : "ايوه . الو . معك .. هه ، علّى صوتك اسمعه .." كلام . انغام . موال الليالى والسهر ، بص للسما . نجوم وقمر وطيارة ، وعلى الارض قعد الصبى .. يشد الخيط مرة ، ومرة تانية يرخيه ، والطيارة بتلعب مع النجوم فى نور القمر .. " يا الله يا طيارة . هات النجمة عشان انزّلك .. الجو برّد ، ولو طلعت عليك الشمس ح تفرتكك .. الو . سمعانى ؟؟ الو . طيارة .. " كتبت له رسالة .. حروف . كلمات . جمل .. ضحك .. ربط الصبى طرف الخيط فى وتد مدقوق فى الارض ، ونام جانبه .. احلام . كوابيس ورؤية ، من النوم صحى .. طلع عليه الضحى . قام نط فى الترعة . استحمى واغتسل ، من الغيط اكل .. اكل وشرب . فى حفرة تبرز وبال مثل القطط .. وللطيارة رجع يشد الخيط .. "يا طيارة . الو . الو . معك حسن . يا طيارة النحمة . فات زمن . البنت سلوى كبرت بـ تسلم عليك . جابت بنتين وولد .. " رجل وامرأة وأولاد .. ارض وسماء وبشر .. الولد تزوج والبنت تخرجت . هى تبحث الآن عن عريس . عريس وعروسة وعملوا الفرح .. حسن التقى سلوى : معقول !؟ حسن !؟ ازيك يا حسن ؟! عامل ايه يا حسن ؟! ورد عليها حسن : "اهلا سلوى . ازيك يا سلوى ؟! واحشانى قوى .. " على راس الغيط قعدوا . حسن وسلوى .. ماضى وحاضر ومستقبل .. وفى آخر النهار ، سلوى قالت له ( لحسن ) : يالله بينا يا حسن نروحوا .. حسن بص فى السما . مد ايده . مسك الخيط المربوط فى الوتد . هزه .. " الو . طيارة .. الو . طيارة . حسن ينادى . الو . طيارة .. اشترينا نجف .. "
تعليقات
إرسال تعليق