حكاية بنت اسمها سلوى
ــــــــــــــــــــــــــــــــــــــــــــــــ
الولد اسمه حسن
والبنت اسمها سلوى
سلوى بنت جميلة جدا. الكل بيحكى عن جمالها ودلالها وخفة دمها
كل ده مش مهم
المهم عقلها وذكاءها وبعد نظرها
البلد كلها بـ تتكلم عليها
الولد حسن ما تعرف إن كان أهبل واللا عبيط
واللا حمار خلقه ربنا
كل شغلته و كل اللي يعرفه في الدنيا هو صيد السمك
طول النهار على شط النيل قاعد بصنارة وصفارة
يصطاد ويغنى
الولد حسن شكله مش بطال
لكن البنت سلوى أجمل منه
الولد حسن اتجوز البنت سلوى وبقت في البلد مضحكة
اتجوزته، والمهر
غنوتين و2 كيلو سمك،
وغنى لها حسن:
يا اللي دوبنى الغرام في سحر عيونك
إيه في الدنيا أجمل من عيون نشوف فيها الدنيا ورود وزهور وجناين شجر؟
ايه في الدنيا أجمل من عيون ما نشوف فيها الجراح والصراخ وهموم البشر؟
ايه في الدنيا أجمل من عيون نشوف بيها الأمل أو حتى لحظة فرح؟
يا اللي عيونك علمتني العمر ما ابكى واللا أشكى
قسوة الأيام وألام السهد وطول الليالي والسهر
الولد حسن اتجوز البنت سلوى. عاشوا سوا
الولد حسن والبنت سلوى خلفوا بنت وولد
الولد كبر. اتعلم، وقعد ع الرصيف يبيع خص وجزر
والبنت كبرت واتجوزت. خلفت. جوزها طفش.
بـ يقولوا انتحر
البنت قاعدة على راس الغيط بتاكل برسيم، وترضع بنتها
بز حشيش وبز هم وحسرة وألم
وحسن قاعد على شط النيل وجانبه سلوى
حسن حكى لسلوى الحكاية، حلفت 100 يمين لتتجوزة:
مكتوب علىّ اتجوزك يا حسن. تتجوّزنى يا حسن؟؟!
حسن عمل عريس وسلوى عملت عروسة،
وكان مهرها
غنوتين و 2 كيلو سمك
تعليقات
إرسال تعليق