أيه الحكاية؟! كل
واحد تاعب نفسه طول النهار يقول للبيحبها: أنا بحبك. أنا بموت فيك. أنا باعشقك.
أنت زي الوردة المفتحة.. كلام × كلام. الكلام ده ما ينفعش. إحنا عايزين الكلام
العملي اللي هو بجد. مش نقعدوا كل شوية أم كلثوم تغني واللي تسمع لي عبد الحليم،
لا لا. أقول أنا الكلام اللي هو بجد ومفيد. أيه رأيك (يا بنت الحلال) أنا عندي نص
فدان (ده كل اللي حيلتي من الدنيا) ح أبني لك علي نصه قصر تعيشي فيه، ونصه التاني
ح أعملهولك بستان. شجر وورد وزهور، ح أخليهملك آاااخر جنان. القصر والبستان،
بصراحة كده النص فدان ده بين السما والأرض، يعني زهقانه شوية. ح تبصي من الشباك. ح
تشوفي الدنيا وبلاويها والمشاكل السودة اللي فيها. ح تشوفي حاجات غريبة وعجيبة.
وطبعا لما ح تشوفي البلاوي دي كلها. ح تهون عليك أي مشكلة أو أي حاجة مزعلاك، وأهو
بالمرة تتفرجي ع اللي بيحصل للناس في الدنيا، وتشوفي وتتأملي قد إيه وازاي بـ يعملوا
في بعض. فصولات ومقالب وخداع وغش واستعباط، حاجات من دي كتير. كنير.
ولو عايزه تتمتعي
أكتر. بصي من شرفة القصر، وطلي ع البستان ح تشوفي الزرع الأخضر الجميل وتشوفي
الورد والفل والياسمين وعيدان الريحان والعطر. ح تشوفي من دا كتير . كتير. وجداول
الميه والعصافير والبلابل.. ح أخللي لك البستان جنه. يعني ح تروقي فيه آخر روقان.
الحكاية كدا واللا كدة. يعني فيه حبة زعل (الأمر م يستغناش طبعا) في الحالة دي ح
تبقي قريبة من السما، أخطفي رجلك ( فركة كعب) لحد النجوم. أهو منك تتفسحي معاها،
ومنك تلعبيلك شوية. خللي بالك أن النجوم
دي متعة،، حاجه سهلة خالص. تفضلي (طول النهار) من مجرة لمجرة. ح تبصي تلاقي الوقت بـ
يمر كأنه ثواني بـ تجرى. عمرك م ح تحسي بزعل، ولا ح تحسي بأي ملل، هو ده طبع
النجوم . ميزتها تسلي الناس، واللا يسلام لو صادفك وقابلتي القمر. يا سلام.. القمر
دا كييف كلام . ح يقولك حكايات للصبح. ح يقلك حكاية نعيمة وباتعة وفاطمه. القمر
عارف كل حكايات العشاق واحد واحد وواحدة وحده، وبالتفصيل، ح يقولك (مثلا) علي
حكاية ميادة اللي لا يمكن تكوني شوفتيها لا في سيما ولا في فيلم ولا في تليفزيون.
يا خبر علي القمر، عنده حكايات وأسرار. أهو تسمعي وتستمتعي وتنبسطي وتزأططي.
صدقيني ح تعيشي حياتك كلها سعادة ومتعة، وخللي بالك أنا مش ح أجيب لك تليفزيون. لا
ملون ولا أبيض وأسود. عندك يا ستي (وجنب منك) كل الأقمار الصناعية. افتحي أي قمر
فيهم، ح تلاقي عليه بلاوي الدنيا كلها، وأنا عارف إن أنت مش ناقصة. المهم أنا كده
عملت اللي عليّ. أيه رأيك؟! قوليلي أبدأ ابنيلك القصر أمتي؟؟ وأمتي أعملك البستان؟
بكره . ماشي . طلباتك أوامر. أنت تقولي وأنا عليّ أنفذ.. الله, إيه رأيك يا ستي في
الجمال ده؟! القصر والبستان؟! ياللا عيشي واتمتعي وهيصي براحتك، هو فيه في الدنيا
أجمل من بستان الكلام؟! إيه رأيك م تيجي بقي نقولوا لبعض كلمة واحدة. أنت بالفتح
وأنا بالكسر، وأهو دا كل اللي عندي يا بنت الحلال. النص فدان، وزرعتهولك نصه بستان
والنص التاني بنيت لك فيه القصر. قصر الكلام.
( معلمي. خللي
بالك يا معلمي أنت نسيت النت يا معلمي. كسفتنا مع البنية. الله يكسفك يا معلمي)
تعليقات
إرسال تعليق