يا سلام ع الحب

   يا سلام ع الحب!! خللي بالك يا صاحبي، أوعي تزعل من اللي بـ يحبك. ليدعي عليك، أوعي؛ لأنه لو دعي عليك اللي بـ حبك. لانت رايح ولانت جاي؛ اذا كان دا حالك مع صاحبك اللي بـ يحبك. يبقي أزي حالك مع اللي أنت بتكرهه؟! لا. يا صاحبي الدنيا موش خيار وفقوس! لا. الناس يا صاحبي زي الشجر. التفاح. البرقوق. الخوخ. المنجة. العنب. الصبار. أويه فيه ناس زي الصبار. حلاوتهم في مرارتهم، وسبحان من خلق. واللي ما يستحمل مرارة صبره، خساره فيه حلاوة عنبه. الناس فيها الحلو وفيها الوحش، وما حد (أبدا) يعرف مين الحلو ولا يعرف مين الوحش. فيها الكذاب والنصاب والحرامي. فيها العبر، وأنا (ياما) اشتغلت حرامي ونصاب، وعارف. أنا مرة سرقت عماره 16 دور صرتها في منديل، وتحت السرير خبتها، وفي يوم مراتي بـ تنضفلي الدار. في الزبالة لمتها وحدفتها، ولا يهمك. فداك. في ستين داهية. وعمارة ورا عمارة ورا عمارة، لما شوارع بلدنا بقت أكوام زبالة. ولموا يا رجالة. زبالة × زبالة × زبالة. لاحد حس بيه، ولا في يوم حد قالي: أنت بتنيل أيه؟! أيه رأيك في دى الشطارة؟!! وأوعي يا صاحبي تدعي عليّ؛ لأني (خللي بالك) أصلا بـ حبك. وحب الناس (برضه) شطاره، وعمره ما كان خيابة.