تائه في سوق المدينة

                          ـــــــــــــــــــــــــــــــــــــــــــــــــــ

طريق أنا اخترته. مشيته. طويل و اللا قصير. المهم أوصل.. إلي سوق المدينة.. المحال التجارية ودكاكين البقالة والورش الصغيرة. نجارين. سمكرية. حلوانية والمقاهي، السوق مزدحمة بالبشر، وكأن السماء قد أمطرتهم في شهر طوبة. رجالة ونسوان وصبايا وصبيان وعيال، والبيضا والسمرا والسودة والطويلة والقصيرة، يعني الناس من كل الأصناف.. سوق.. اللي ماشي ع الرصيف واللي في نهر الطريق، واللي رايح جاي واللي داخل طالع.. سوق.. تكاتك. عربات كارو. سيارات النقل الخفيفة.. كل المجتمعات اللي ربنا خلقها (كلها) عبارة عن مجموعة من المتناقضات. الدينية. الأيدولوجية. الثقافية. الفكرية. الاقتصادية. الاجتماعية وخليط من القناعات المتعارضة والمتضاربة والمتصادمة. شيء طبيعي وعادي جدا، وده معروف في كل المجتمعات البشرية عبر كل العصور، وكل واحد راسه وألف سيف هو اللي صح والباقي كلهم غلط. ماشي. كلنا علي صواب حتى أنا.. ماشي. عيشة سودة ومنيلة بستين نيلة.. لا شك أنها جميلة. جميلة جدا وحلوة. الله. جمال وحلاوة ورشاقة وخفة دم م حصلتش، لا أعرف كيف تعلقت كفي في الهواء، ممكن أسلم عليك يا قمر زمانك؟ ممكن؟ نهارك أسود.. أيه يا راجل أنت؟! اتهبلت واللا أنت شارب؟! لا أبدا.. هو السلام هبل؟! يخرب بيتك. بمناسبة أيه؟! قالت ذلك وهي تمسك بضحكة كادت أن تفلت علي الرغم منها.. عادي يعني. بمناسبة أني شوفتك، تصور أنك راجل واطي وسافل وابن وسخة، لا شك أن معلوماتها عني غير دقيقة، في أوربا حلوا المشكلة (مشكلة المتناقضات المجتمعية) واستطاعوا أن يعالجوها من خلال الديموقراطية  كوسيلة حكم وكآلية حكم. ربنا بيحبهم جدا. عايشين وعارفين مصلحتهم كويس، ما تعرف مين المعارضة ولا مين الحكومة.. أيه رأيك إن أنا أبن ناس كويسة جدا. أنا (يا ست البنات) ابن عمك فلان ومن العيلة الفلانية وأمي تبقي فلانة وهي (أمي يعني) من العيلة الفلانية، أعتقد أنني قد صححت الكثير من معلوماتها عني، أعتقد ذلك. تشرفنا يا حضرة بمعرفة سيادتك. تسمح بقي تتفضل تمشي بدل م أقلع لك اللي في رجلي أفوّقك، وأفرج عليك خلق الله؟ وكالتلميذ الخائب. انصرفت. الله يخرب بيت الحلوين اللي في الدنيا كلها، هو أنا يعني ناقص بهدلة؟! ملعون أبو الجمال.. يوم والتاني، وقعدت أفكر. أفكر. أفكر، هي عرفت رقم موبايلي منين وأزاي؟! كتبت لي رسالة "يا راجل يا عرة يا أهبل، هو فيه واحد يعاكس مراتو في الشارع؟؟!"