عنك
سألت الحي
ما خليت نايم ولا صاحي
ما خليت واقف ولا ماشي
ما حد عليك دلني، ولا حد أبدا كان عارف
أنتِ كنتِ فين؟
كنتِ فين؟ وأنا داير في الشوارع والحواري
أدور وأفتش عليك. كنت فين؟؟
كنت فينِ؟ وأنا
بأصرخ وأهد الدنيا، والكون في السما أطيره.
أدور عليك
تلات ثواني غايبة عني. كنت فين؟
أنت عارفة الثانية فيها كام فيمتو؟ عارفة؟
يعني ناس عاشت وناس ماتت
ناس وصلت وناس في الطريق تاهت
ناس شبعت وناس جاعت
ناس اتفقرت، وناس ربك غناهم وبالفلوس
الكتيرة زي الرز
ابتلاهم
وياما ناس جات وناس راحت
وناس مرضت وناس ربنا شفاها
وناس وناس وناس
قولي لي أنت: تلات ثواني كنت فين؟
تلات ثواني من عمري ضاعت. كنت فين؟؟
هو الحب لعبة، واللا العشق فوضى، واللا
أنت أيه الحكاية؟
كنتِ فين غايبة عني التلات ثواني؟
يا مفترية يا أم قلب جاحد وآسي
دوختيني وحيريتيني وعذبتيني
تلات ثواني يا غالية. أدور وأفتش عليك
تلات ثواني!!!؟
كنتِ فين؟!
تعليقات
إرسال تعليق