العشه الصفيح

         العشة الصفيح

             ــــــــــــــــــــــــــــــــــــــــــــــــــــ

  لله يا محسنين لله. لله يا محسنين لله. حسنة قليلة تمنع بلاوي كتيرة. لله يا محسنين.. بمهارة وحرفية نحي البوصة وأبعدها عن شفتيه المطليتين باللون البني الداكن من أثر المعسل.. أفرغت باتعه كل محتويات الكيس في حجره. بطاطس. طماطم. فجل. جرجير. خيار أخضر ومخلل. قطع النقود من فئة الجنيه ونصف الجنيه وربع الجنيه. ورك فرخة. قطع لحم صغيرة. اقراص طعمية. أصابع موز.. فين باقي الفلوس يا مرة يا بنت الكلب. خنصرتيها يا فقريه؟ مشغولة هي بنقل كل ما دلقته في حجره الي ركن العشة الصفيح. كوم بطاطس. كوم بصل. كوم خيار... اسكت يا ولد الله ينيلك وينيل أبوك وسنينه السوده، وسنين أمه يا بنت الوسخة يا عره، ناولت حنوره خياراية وثانية لحلوسة أما دحدورة فقد خصته بثمرة الجوافة وصوبع موز. يلعن ميْتين أمك. هو دحدوره أحسن مني؟! قعدوا يتناولون طعام العشاء، وبالأدق يتخاطفون ما يصلح طعاما بدون طهي.. لله يا محسنين لله.. حسنة قليلة تمنع بلاوي كتيرة.. لله يا محسنين لله، وانا اللى في شوارع وحاراتك يا بلدى علي كعبي في عز النار وعز البرد داير، يا مين يستر عرْي، ومن حصا السكك يسترني ويحمي أقدامي. لله يا محسنين لله .. هو انت يا مرة كل يوم وطول النهار دايره لف في الشوارع؟! انت ما بتشبعيش أبدا؟! يا اللي بـ تسأل ربك حسنته.  ما تسأل عويل ولا تسأل بتاع النسوان ولا أبو إزازة. خساره فيه الدعوة. حسنته مسمومه وعلي خسارة.. اسمعي يا مرة أما أقول لك.. بتردد وتوجس اقتربت منه. طلب منها أن تعود الي عشتها وتبلغ زوجها أنه بانتظاره بعد صلاة العشاء. ليه؟ مالك انت؟!. خلليه يقابلني ضروري. شعرت بشيء من انفراجه. ح يشغله عنده!؟  فرغ المصلون من أداء فريضة صلاة العشاء.. قرب اليه الكرسي. اقعد يا حسونة. اقعد احنا اخوات يا راجل. قعد حسونة.. ايه رأيك بكره تكون عندي من الفجرية. خد لك  طنين تلاته أسمنت وعشرتلاف طوبه وكام متر رمل وزلط، وبدل يا حسونة م امراتك طول النهار دايره تشحت في الشوارع، وبدل م تقعدوا في العشة الصفيح. أنا قلت يبقي لك بيت أحسن، والبيوت سترة يا حسونة، واللا انت ايه رأيك؟ كلامك زين والله يا حاج مدبولي. عدّاك العيب. بس انت عارف الايد قصيره والعين بصيره، سيبها علي الله يا حسونه... تبارا العمال في تفريغ العربات الكارو والنصف نقل المحملة بمواد البناء.. بدأت علي الفور عمليات الحفر ووضع الأساس وتقطيع الحديد بالمقاسات المطلوبة. المساحة لا تجاوز النصف قيراط.. أفضل من العشة الصفيح في بطن الجسر.. انهمك عمال البناء في عملهم.. المقاول عينه علي جيب الحاج مدبولي الذي ينفق بسخاء منقطع النظير وغير مسبوق ولا معهود.. يا بختك يا حسونة.. قامت الدنيا ولم تقعد. هاجت وماجت. زوبعة ما بعدها زوبعة. تعالت الأصوات والصراخ واحتدم النزاع والرشق بالطوب والزلط. سالت دماء.. المقاول لا يعنيه كل هذا.. المهم المبلغ المتفق عليه.. هم يا ولد انت وهو.. خللينا نخلص.. الله يخرب بيتك وبيت أمك. أنت أخدت نصيبك يا ابن الكلب علي داير المليم. رحت صرفته علي الخمر والنسوان. جاي تبني في أرضي يا ابن الوسخة يا حرامي؟!! وحد الله يا حاج فتوح. وحد الله. مهما كان ده أخوك. ابن أمك وابوك، وميصحش يبات في عشه صفيح في بطن الجسر. اتقي الله. إيه يعني نص قيراط من عشر فدادين ملكك؟! ايه يعني؟! انصرف الحاج مدبولي.. يا سلام يا بت يا بتعة نص قيراط في نص قيراط والأشية ح تبقي معدن و ح نقبوا علي وش الدنيا والحكاية ح تبقي آخر فل وعشرة، انفجرت باتعة ضاحكة مصهللة مستبشرة.. تصور يا حسونة أنا كنت ظالمه الحاج مدبولي. دوما كنت بأنيله بستين نيلة هو وأهله واللي حابوه واللي خلفوا أمه.. يا سلام يا اولاد.. فزي قومي يا مره ولعي لنا كولحتين ورصي لنا كرسي معسل. فزي قومي يا مره. فزي. ملحوق ع النوم. لساك الوقت بدري وليلتك سوده وطويله، فاطمأنت باتعة وأيقنت أنها ستقضي ليلة ممتعة.. تعالي الصراخ والعويل مرة أخري.. في جوف الليل جرف ماء النهر العشة الصفيح وابتلع باتعه وابتلع حسونه وأشياء كثيرة .. وتلاغط الناس فيما بينهم.. هو انهيار الجسر مسؤولية مين؟؟!