عالم الفيس

   خيرت بين اثنتين فاخترت، فلو كان الكلام يجدي لكنت ثرثرت.. الكلام. الكلام شيء مهم طبعا؛ لأننا من خلاله نعبر عن آمالنا وآلامنا. احلامنا. أوجاعنا. تطلعاتنا. همومنا.. نخبر الأخر. نعرف الأخر. أشياء كثيرة. الكلام، ومن هنا تلحظ أو ندرك أهمية ظاهرة التواصل الاجتماعي (الفيس) فهل هي مهمة؟ أعتقد. هي عامله زي (بلغة الموظفين) دفتر الحضور والانصراف، نثبت فيها التواجد علي الارض، تشبه النافذة التي اطل منها علي دنيا الناس.. اللي ماشي واللي واقف واللي قاعد مكانه. ناس. الشباب. الشابات. صبيان وبنات. اللي متجوزة واللي متطلقه، واللي جوزها منكد عليها ومسود عيشتها. واللي مدوخاه السبع دوحات، اللي بتدور علي عريس واللي بيدور علي عروسة، واللي لساه بيحب جديد. ناس. عالم. دنيا. اللي زعلان واللي فرحان، مهرجان شتيمة وسب ولعن. ردح من اللي قلبك يحبه. واللي قاعد يعمل مقالب ويدق في أسافين، واللي مخللي الدنيا حبر. سودة وهباب وطين، صور. فيديوهات. رقص وزمر وطبل وهيصه. قصص وأشعار وحكايات. بسم الله ما شاء الله. تقرا أحاديث وقرآن. واللي في العمرة واللي بـ يحج. دنيا. تسمع شكاوي. تسمع آهات. تشوف آلام. تشوف أحزان وناس مدبوحين. تشوف ناس مدوخها الزمن وناس مدوخاه. ناس. بشر. اللي داخل واللي خارج. كأن الواحد قاعد في قهوة العجايب. كبييييرة. ناس كتيرة. كتيرة. واكلها الهم. اللي يقولك حكاية تحزنك وتبكيك، واللي يفقع نكتة تفطس عليها من الضحك، واساحبي جاهز وفي الخدمة. حياة. دنيا. عالم. وحكومة وأخبار سودة وبيضا وحمرا وصفرا وبنبي. كل الألوان وكل الأشكال. ناس. رجالة ونسوان وبنات وهيييييييصة. حياة. حياة. عالم.. وأهي دنيا وكله كلام في كلام في كلام.. ومضينا في دفتر الحضور والانصراف، وقفلنا الشباك وفتحنا الشباك..