ألف ليلة وليلة
ـــــــــــــــــــــــــــــــــــــــــــــــــ
شبراخيت
طبعا. أنت عارفها
كنت زمان كلمتك عنها
يمكن من أربع تلاف سنة، واكتر
ألف ليلة وليلة
يمكن. يمكن تكون قرتها
القصة دى وبكل أحداثها وحوادتها
واحلف لك. كل وقائعها
منقولة بالنص
نسخة وبالكربون
من شبراخيت النيل
كلمة كلمة وحرف حرف
والدليل؟!
ألف ليلة وليلة فيها ناس
وشبراخيت مليانه ناس
ألف ليلة وليلة فيها شجر
وشبراخيت كلها شجر
ألف ليلة وليلة فيها ميه
وشبراخيت ع النيل
فيها ناس.. رجاله ونسوان.. عيال.
شبان. عذارى وبكر. بنات..
فيها شجر فاكهة وخضره كمان
ناس رايحه وناس جايه
واللا البنت البيضا
ما هي بنت خالتي خضره
عارفها؟! يا سلام
جمالها. دلالها. حلاوتها وخفتها
واللا شعرها
واللا قوامها
يا هووه
على نظرتها
واللا عفتها وصحتها.. ريحتها
تصور!!
في يوم ماشيه
رايحه للخياطة
دى فيها حاجه؟!!
اللي في "مستناد" واللي
في "اشبريس"
و"الزنقله" و"محلة
بشر" و"الأصلاب"
م تقولش معازيم
جايين ليلة دخلتها
يحضروا زفتها
عدّت ع القهوة. عدّت
شموا يا عيني ريحتها
اللي انسطل، واللي اترمى
واللي أغمى عليه
لحد النهار ده يا عيني ما فاق
واللي انهبل. واللي اتعبط
واللي على خده لطم
من حسرته.. حب يا عيني ما طال
هب. طب ساكت
م حد شاله
ولا حد حتى دور عليه
واللي طار في الهوى، واللي أنكوى
السيجارة والشيشة والدخان
وصاحب القهوة
في الفنجان
واللي قال:
من عزم ما به:
آه.. آه.. سمعته النجوم
بصت عليه
والقمر طلع
والشمس سألت: هو فيه إيه ؟!!
دلالها وجمالها، واللا عفتها وخفتها
البنت ماشيه
فيها حاجه؟!
اللي في كباية الشي داب
م حد لحقه، ولا حد طلعه
الواد عاشور
عاشور ابن نجية
يا ولداه. اتهبل
لبس بدله.. بنطلون وقميص
تصور!!
مات
لا حول ولا قوة إلا بالله
مات
قال ايه!؟ سموه
عشان مره خاض في سيرتها
يا حلاوتها وخفتها، واللا مشيتها
م تقولش ملاك
ع الأرض داير يتمخطر
علمت
حزنت عليه
نزلت دمعتها
فاض النيل
ياه ع اللى حصل في ليلتها
وحشه في زعلتها
غرّقت دموعها كام فدان
وعزبة "محروس" و"السوالم"
قبلي وبحري
وبقرة عم حسين المنفوخ
والحي بات صاحي من ساعتها
اسكت. اسكت
لـ تدوب وتموت
وتروح في جرّتها
حلاوتها وخفتها.. شطارتها وسمعتها
يا هووه، واللا مشيتها
عيني عليك يا اللي حبتها
حذرتك
أوعى تجيب تانى سيرتها
حذرتك
أوعى في يوم تنزل دمعتها
واللا ليلة زفتها ودخلتها
مش ح أقول لك
لـ تفلس
وتـ ضيع
والسبب. ح يقولوا: فرحتها
ومن ليلتها والناس قاعده تحكى
والحدوتة بتاعتها
واللا عريسها
واد مجدع
فالح. يقدّر. شامخ
ما هو ابن بلد. ابن حتتها
عينه بس لمحتها
ومن يومها وفى ليلتها
يا سلام
على ليلته وليلة سعادتها
القصر البنور
المليان نور
هو اللي بناه
الورد والياسمين وعود الفل والريحان
الجاموسة والبقرة والعربية
الساقية على راس الغيط
ومكنة الميه
هو اللي جايبهم
في ساعة ضحوية
وكانت ليلة.. يا سلام
على ليلتها وزفتها وسعادتها
وفى ألف ليلة وليلة.. الناس
كتبتها
تعليقات
إرسال تعليق