زيارة
الي القاهرة والعودة
ـ ـــــــــــــــــــــــــــــــــــــــــــــــــــــــــــــــــــــــــ
مشكلتي مع المواصلات كبيرة جدا. عدم اقتناع.
التكتك. السيارة. الباص. القطار.. غير مقتنع. المشي احسن طبعا. والمسافة الي
القاهرة 300 كم. يعني موش مشكلة. رغفين عيش في شوال وحتة جبنة وازازة ميه. جوعت
آكل. عطشت اشرب، وتوكلت علي الله. مشيت. نهار يعدي وليل يجي، وأديني ماشي. توهت
وضليت الطريق أسأل. خد يمينك وامشي دغري. في ضل شجرة اريح أو علي رصيف واللا جنب
حيطة أو في بطن الطريق، أيام تعدي وأديني ماشي.. الأيام زي بعضها. حدها زي سبتها
زي جمعتها. ما تفرق. أهي أيام وأديني ماشي.. دي بقي القاهرة؟ لا. دي طنطا. خد
الطريق ده وامشي دغري، ومشيت. قلت أريح وأتعشى يمكن يجيبوا لي بنها، واهي ايام
وتعدي. فاضل كتير ع القاهرة؟ واديني ماشي. أوصل واقضي مشواري وارجع. ايام حر وايام
برد. ومشوار يمكن في يوم أوصل.. انوار. مآذن. كنائس. سيارات. شوارع. عمارات. ناس
ماشيه في بعضها بـ تخبط. واللي مستعجل من تحت العربية بسرعة البرق عدا.. يلحق
المترو. الحمد لله. قضيت مشواري. قلت ارجع، ورجعت. ورجعت تانى الأيام. ورجعت تانى الليالي
في بعضيها تدخل.. مدن وبلاد وطرق، ومرة خد يمينك ومرة تانية خد شمالك. ما في مرة
ابدا حد سألني: رايح فين ولا جاي منين وأديني ماشي.. ايام. شهور. سنين، وقلت لبيتي
ارجع، ورجعت وقلت اسأل: بيتي فين يا ابني؟ امشي طوالى وقبل نهاية الطريق خد شمالك
ح تلاقي بيتك. لمة عيال بـ تلعب. اللي راكب عجلة، واللي بـ يشوط كوره علي زميله،
وبنت صغيره قاعده ع العتبة في حجرها عروستها بـ تنيمها.. فجأة. العيال هاجت وماجت.
عملوا مظاهره: جدو جه. جدو جه. جدو جه. غريبة! مين جدو؟! مين العيال دي؟! وصوت
يمكن اكون قبل كدا سمعته: ياللا خد العلاج عشان تتعشي.. اخدت العلاج واتعشيت.
الحمد لله.. نفس الصوت. نفس الصوت: ياللا بقي اعمل زي سامي ابن خالتك م قال لك:
نام يا هليهى واتغطى.
تعليقات
إرسال تعليق