دردشة كلام

     دردشة كلام

        ــــــــــــــــــــــــــــــــــــ

ولكل بعير عقاله

وعقال المرء عقله

يحكم النفس من شطحات الهوي والنزوات

فمن بات بغير عقال للكواسر فريسة 

والأمم للأمم اما كواسر واما فريسة

ـــــــــــــــــــــــــــــــــــــــــــــــــــــــــــــــــــــــــــــــ

   نسيبوا الشأن المصري اللي بيزعل الناس من بعضها ويدخلهم في متاهات لا أول لها ولا أخر، وفي الأخر كل واحد بـ يعمل اللي هو عايزه، يعني لا تقدر تقنعني ولا اقدر اقنعك.." إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَن يَشَاءُ..."  وخللي بالك من "لا" وم تقوليش شعب جاهل؛ لأن ما في حاجة في الدنيا اسمها شعب عالم، يعني ح نغلطوا في الناس أونطه، يعني ترامب بـ يعمل اللي هو عايزه ولا شوفنا ثورة ولا م ثوراش، يعني الراجل طلع قرار حكاية القدس والدنيا كلها هاجت عليه، والشعب الأمريكي ولا هو هنا ودن من طين وودن من عجين، وقبل الانتخابات قعد يفرق تصريحات بالكوم وبعد م بقي رئيس م حد قال له حتي ازيك. كييف خلق مشاكل.. خللينا في موضوعنا أحسن.. كل واحد بـ يحسبها بطريقته، والناس عارفه كويس جدا جدا  "إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ" فسعي كل علي رزقه اللي راضي أهو راضي واللي موش عاجبه موش عاجبه.. حضرتك ح تكلمني عن فيه ظلم عشرة ح يردوا عليك و ح تبقي حكاية، وأنا والله لا أنا رجل قضاء ولا رجل سياسة ولا رجل دين، يعني كل اللي اعرفه في الدنيا دي اعشي ولادي ودمتم، وكان الله يحب المحسنين، وبارك الله فيما رزق. ماشي. وأنا من طبيعتي احب اذا ما تكلمت فأتكلم بما أعلم ولا أتكلم أبدا أبدا بما أعرف، يعني تقول لي الشمس طالعة أقول لك هات لي الدليل موثق ومعتمد وعليه شهود ومتفق عليه، يعني ايه يا هليهي؟ يعني (مثلا) انجلترا احتلت مصر عام 1882 هات لي الدليل هو أنا كنت شوفت؟ المتفق عليه دليل، حد يقدر يقول محصلش؟ وليس بعد الكفر ذنب. يعني مصيبة سودة حتي لو كان الانجليز بيفرقوا علي الناس شربات وبـ يصبحوا عليهم بالورد والملبس، وطبعا فيه فرق بين التاريخ ومرويات أو روايات التاريخ.. دي حاجة ودي حاجة، ومن النقطة دي بالذات بـ يستمد جمال عبد الناصر أهميته وقيمته في التاريخ الانساني، زي السادات واسترداد سيناء وحكاية حلايب وشلاتين، و ح ترد بتيران وصنافير. اسأل انجلترا؛ لأنها كانت محتلة مصر ولها نفوذها في منطقة الخليج العربي (شبه الجزيرة العربية)، وبلاش كلام في الموضوع ده عشان م نزعلوش انجلترا مننا، وأنا واحد من الناس المعجبين جدا جدا جدا بـ انجلترا، ناس بـ يعملوا لمصلحة بلدهم، ومعروف ان السياسي البريطاني من ابرع وامهر السياسيين في العالم، وتعتبر انجلترا مخزن أسرار العالم، يعني لا تقول لي أمريكا ولا روسيا ولا الصين ولا أي دولة في العالم، والنقطة دي بالذات محيراني جدا ازاي ان انجلترا تخرج من الاتحاد الأوربي؟ ازاي؟ هم الاتحاد الأوربي ناس طيبين للدرجة دي؟ أحسن دولة في العالم تخطط لمئات السنين، وأحسن دولة في العالم تعرف مصلحتها ومصلحة شعبها، حتى ولو علي حساب اجعص دولة في العالم، وده في علم السياسة موش عيب. لا طبعا، السياسي الانجليزي لا ند له ولا نظير بـ يفكروني بسيدنا معاوية. من ابرز السياسيين في العالم الاسلامي؛ لأنه مزج بين قوة العقل وعقل القوة، ودي عايزه سياسي متفرد ومن نوع خاص وسبحان الله في ملكه " إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَن يَشَاءُ..."