فرح صباح
ــــــــــــــــــــــــــــــــــــــــــــــــــــــــــــــ
اعادة نشر
(منشور في 6 فبراير 2018 كسر الليالي)
نفتح النافذة وقتما نشاء. ليلا أو نهارا. في الوقت
الذي يروقنا. يناسبنا. غير عابئين ببرد، حتي وان كان زمهريرا أو حر ولو كان هجيرا.
تسقط الامطار أو لا تسقط. يسود الظلام فترتدي الدنيا سربالها الأسود. تسطع الشمس فيشملها
النور تتلفع به. يضيق الصدر فيكون حرجا أو ينفرج كأنه الفضاء الرحب، كأننا سمكة تنعم
بماء البحر تسبح هنا وهناك فلا تقيم لصياد وزنا ولا لشص. نفتح النافذة نطل منها علي
العالم. فرح صباح. ليلة زفافها.. نفتحها لنطل علي العالم في الصحة وفي المرض. في اليسر
وفي العسر. ما هي قيمة العمر او قيمة الزمن؟ غابة من اشجار المتناقضات وشجيراتها وحشائشها.
غابة. عالم. دنيا. نتفرج. خلافات. صراعات. صدامات. زغاريد. حفل عرس واشلاء ودمار وخراب
واعياد الميلاد وسيل دماء. مأتم وحفل شدو وغناء. صمت وكلام. كلام. كلام ودوي المدافع
وطلقات الرصاص. نفتح النافذة لنطل منها علي العالم.. عودت عيني على رؤياك وقلبي سلم
لك أمري. أشوف هنا عيني في نظرتك لي. نفتح النافذة. كيلو الطماطم بكام النهارده يا
عم محمد؟ اللي اتنين بخمسة يا صباح. خد. هات اتنين كيلو. الحوثيين اغتالوا عبد الله
صالح. ياسلام يابت يا صباح لو ربنا يجعل لك نصيب فيه. وائل ابوه غني ومتريش. آه منك
انت يامه. عايزة تاكلي موز وتفاح علي قفايه. اتنلي. هو انت تطولي؟ تكاتك. عربيات نص
نقل خفيفة. ناس. شباب. بنات. نسوان. رجاله. صبايا. ناس رايحه وجايه. قرب. قرب الكيلوا
بعشرة جنيه. عليه العوض يا اولاد. قرب. قرب. هي الأحوال في سورية ح تستقر امتي؟ هم
لزقين بشار بغرة؟ ناس تغلط وناس تدفع التمن. يا سيدي يعني هو بشار أقل من حلف شمال
الأطلنطي؟ ولع في ليبيا. قتل القذافي. يا فرحتي. عمل الواجب. نيل الدنيا بستين نيلة
وطلع. جبتي اللحمة يا بت؟ ايوه يامه. نيلتها في التلاجة. امتلأ الكيس بصنوف الفاكهة.
موز. تفاح. جوافة. بلح احمر واسود. تعرفي يابت يا صباح أنا نفسي اجيب لك هدية تليق
بجمالك. ياسم. ايه اللي حايشك؟ والده يراقب الموقف. لم يعترض علي تصرف ولده وائل. عادة
ما تنقطع وقلوب المحسنين عمار، وهو ينفخ دخان المعسل الذي سحبه من الشيشة. اسمعي يا
بت يا صباح. ايه رأيك ازوركم النهار ده؟ بعد العشا. منه لله الحياء. ارتبكت. اسعد لحظات
البنت هي اللحظة التي تؤكد لها صدق حسها فتبلغ مرادها.. اقولك ايه عن الشوق يا حبيبى
اقولك ايه ومين غيرك دارى بى
ليالى فى هواك اسهر و افكر
ومهما قلتلك فى القلب اكثر
شويه انى اقولك يا حبيبى
ياريت فى كلمه اكتر من حبيبى..
بتلعثم. تشرف يا عم الحاج. بلغي مامتك.. حملت الكيس. لازت بالفرار. السعودية دمرت صاروخا
بالستيا أطلقه الحوثيون. يبقي من حقهم يبقوا عضو دائم في مجلس الأمن. الأمريكان عندهم
صواريخ والحوثيون عندهم صواريخ. نفتح النافذة لنطل منها علي العالم. هل العالم نكتة،
فشر البلية ما يضحك. هل هو فزورة؟ والشاطر اللي يحلها. هل العالم مسلسل او فيلم؟ الناس
تتفرج عليه. يتسلوا يعني؟ هو يا بت قال لك كدا؟ ايوه يامه. قال لي كده. طيب يا بت اشهلي
روحي لخالتك. هات منها الفستان البصلي بتاع بنتها نادية. قولي لها تيجي ضروري ومعاها
علبة المكياح. خالتك شاطرة وتعرف في الحاجات دي. والله ما أنا عارفة ح نفضلوا شحاتين
لحد امتي؟ طول عمرك خايبة يا امه. بـ تقولي حاجة يابت؟ انا رايحه اهو. تجاوبت دقات
القلب مع رنين جرس الباب. يماالقمر عالباب نور قناديله. يما أرد الباب والا أنادي له
يما.. أما. وائل ابني يا حاجة ولد متربي تمام. يعرف يصون بنتك. هو بـ يشتغل ايه يا
حاج؟ معاه بكالريوس تجارة وفكهاني يعجبك. همست الأم في أذن ابنتها. قولي له يا بت انت
معاك ايه. تذكرت أيام الهنا، فضحكت صباح. يا امه بلاش فضايح. ربنا أمر بالستر. الامريكان
خففوا من تواجدهم العسكري في العراق. هم داعش خلصوا؟ هيصة وزفة. زغاريد. أنوار. عالمه
بترقص. مزيكة بتضرب. معازيم، ونفتح النافذة لنطل منها علي العالم. هل الدنيا حلم نحققه
ام هي قدر نعيشه او نعايشه؟ علينا أن نقتنص ساعات الفرح لنستمتع ولو قليلا، فهي، ساعات
الفرح، نوفالجين الحياة.. تزوجت صباح. انقطعت عنا اخبارها. أما وائل فقد حل محل والده
في تجارة الفاكهة. فهو الآن صاحب وكالة. هل نقفل النافذة؟
تعليقات
إرسال تعليق